Wat maak hierdie gekombineerde, trots Afrikaanse skool aan die voet van die Piketberge die leierskool in die Swartland- en Weskusomgewing?

​

Is dit ons onoortreflike akademiese rekord? Die feit dat ons ‘n Dinaledi fokusskool is vir uitsonderlike onderrig in wiskunde en fisiese wetenskappe? Of ons volhoubare prestasies op sport- en kultuurgebied? Ons waardes? Is dit ons voortdurende strewe na uitnemendheid in dissipline en respek vir mekaar, vir gesag en leierskap? Ons toegewyde, hoog gekwalifiseerde onderwysers? Is dit die skep van geleenthede vir al ons leerders op alle terreine?

​

JA! En natuurlik, duisende kere JA!

​

Maar PHS is baie, baie meer.

​

Hier streef ons daarna om die unieke handelsmerk van elke kind te ontdek, te respekteer en te ontwikkel. En omdat die lewe veel groter is as net die wen, is ons fokus op balans en waardering vir die feit dat ons almal uniek en verskillend is. Elke persoonlikheid en talent is nodig om die dinamika en groter prentjie van ons skool te vorm. Daarom skep ons geleenthede hier vir persoonlike groei. Ons luister na mekaar se opinies. Ons beklemtoon lojaliteit, saamhorigheid, toewyding, respek vir die natuur en ons pragtige omgewing. Hier leer ons die kuns om met grasie te wen en met waardigheid te verloor - die moed om op te staan en weer te probeer.

​

Hier smee ons lewenslange vriendskappe en gee om vir mekaar. Hier deel ons in die vreugde van prestasie, ondersteun, beloon, moedig aan, berispe, troos, lag, en deel ons die hart van die platteland met mekaar en besoekers. Hier werk ons hard, maar gee ons genoeg tyd vir speel. Hier stap die toekoms van môre nog ongekompliseerd kaalvoet rond.

​

Ons nooi jou uit om deel te wees van hierdie reis...